A e dini për lidhjen e thellë që ka Profeti Muhammed (a.s.) me GAZËN (Tokën e Shenjtë)?

Për botën myslimanë, zakonisht lidhjet me Palestinën e shohin përmes Ibrahimit (a.s.), Musait (a.s.) dhe ndoshta edhe Profetit Sulejman (a.s.).

Por a e dini për lidhjen e thellë që ka Profeti Muhammed (a.s.) me Tokën e Shenjtë?

Këto lidhje shtrihen që nga gjenealogjia e tij fisnike, deri tek stërgjyshi i tij, Haxhimi (Amr ibn Abd Menaf), një burrë që la pas një trashëgimi ende të gdhendur në vetë tokën e Gazës.
Në shekullin e 5-të, gjatë një periudhe urie në Mekë, Haxhimi udhëtoi drejt Shamit, rajoni i bekuar që përfshin Palestinën, dhe shpenzoi gjithë pasurinë e tij për të sjellë ushqim për popullin e tij. Ai theu bukët e pjekura, i përzieu në lëng dhe i ushqeu njerëzit, duke fituar kështu emrin Haxhim (“ai që thyen”).

Ai gjithashtu vendosi rrugë tregtare, hapi puse uji dhe krijoi një sistem përkujdesjeje për të varfrit, vepra mëshire shumë kohë para se të lindte Profeti (a.s.).

Në kthim nga ajo udhë, Haxhimi ndërroi jetë në Gaza dhe aty u varros. Ky moment shënoi fillimin e trashëgimisë së nderuar të Gazës në kujtesën islame, duke u bërë një qendër tregtare dhe një vend ku u vendosën pasardhës të Haxhimit.

Më vonë, Gaza do të bëhej vendlindja e Imam Shafiut, një prej dijetarëve më me ndikim të traditës islame dhe pasardhës i familjes së Profetit (a.s.). Gaza është një tokë trashëgimie, dijeje dhe sakrifice. Një kufi i ribatit, i qëndresës dhe i shpërblimit. Dhe kjo trashëgimi nga Haxhimi te Imam Shafiu, nga sahabët te dijetarët që ruanin brigjet e saj vazhdon edhe sot, në qëndrueshmërinë e popullit të saj.

Mos harroni kurrë: Gaza mban gjurmët e familjes së Profetit (a.s.). Toka e saj ka mbajtur eshtrat e tyre, dhe qielli i saj ende jehon me lutjet e të drejtëve.