“Motrën do ta q*”, Lul Morina kërcënon gazetarin pas investigimit

Ndërtuesi i pallateve Juljan Morina është vendosur në qendër të vëmendjes pas publikimit të një shkrimi investigues, i cili nxirrte në dritë të shkuarën e tij kriminale dhe lidhjet e forta me personazhet politike.

Gazetari Almer Toska thotë se është kërcënuar drejtpërdrejt nga biznesmeni me anë të mesazheve në rrjetet sociale, vetëm sepse ai publikoi një shkrim.

Në shkrimin e tij, Toska foli për të shkuarën e Juljan Morinës si trafikant femrash dhe droge, madje edhe për lidhjet që gëzon ai me personazhe të rëndësishme politike, prej të cilëve herë pas here fiton leje ndërtimi.

Menjëherë biznesmeni i ka dërguar disa mesazhe shantazhuese ku i shkruan: “Motrën do te q* o kur*a Rroskovecit.”

Sipas gazetarit, “ky veprim tregon qartë se Morina nuk ka asnjë argument kundër fakteve të publikuara, por përpiqet të heshtë të vërtetën me kërcënime.”

Në deklaratë, Lul Morina përshkruhet si shembull i ndërthurjes së krimit të organizuar me politikën dhe ekonominë në Shqipëri, duke kaluar nga aktivitetet kriminale në vitet ’90 në përfitime të mëdha në sektorin e ndërtimit përmes lidhjeve politike dhe blerjes së votave.

Gazetari kërkon që autoritetet, përfshirë policinë, prokurorinë dhe SPAK-un të ndërhynë menjëherë, përpara se këto kërcënime të bëhen realitet.

“Ky është momenti kur Policia, Prokuroria dhe SPAK duhet të tregojnë se a janë në shërbim të qytetarëve apo në shërbim të trafikantëve të lidhur me pushtetin. Shqipëria nuk mund të vazhdojë të jetë vendi ku trafikantët bëhen ndërtues, ku blerësit e votave bëhen partnerë të qeverisë, dhe ku kërcënuesit trajtohen si të paprekshëm. Lul Morina duhet të hetohet, të ndëshkohet dhe të ndalet përpara se kërcënimi i tij të bëhet realitet për këdo tjetër që guxon të thotë të vërtetën,” shkruan gazetari.

Ky është një nga dhjetëra rastet kur gazetarët bien pre e kërcënimeve për shkak të punës së tyre, prandaj institucionet duhet të marrin masa që këto raste të kenë ndëshkimin e parashikuar nga ligji.

Reagimi i plotë i gazetarit:

Njoftim Publik dhe Denoncim

Pas publikimit të shkrimit investigativ mbi biznesmenin Lul Morina, ku u faktua e kaluara e tij kriminale si trafikant femrash dhe droge, lidhjet e tij me pushtetin e sotëm dhe përfitimi i lejeve të ndërtimit falë mbështetjes politike nga Belinda Balluku, unë jam kërcënuar hapur. Morina më ka dërguar mesazhe fyese ndaj familjes sime dhe ka përdorur gjuhën e shantazhit për të më frikësuar.

Ky veprim tregon qartë se Morina nuk ka asnjë argument kundër fakteve të publikuara, por përpiqet të heshtë të vërtetën me kërcënime. Ai vepron siç ka bërë gjithmonë, me dhunë dhe arrogancë, duke besuar se lidhjet e tij me pushtetin e mbrojnë nga ligji. Por kjo nuk është më një çështje personale mes meje dhe tij, është një çështje publike që prek të gjithë shoqërinë shqiptare.

Policia e Shtetit dhe SPAK nuk mund të heshtin. Nëse kërcënimet e hapura nga një person me të kaluar kriminale nuk mjaftojnë për të nxitur veprimet e organeve ligjzbatuese, atëherë ky vend është peng i mafies së pushtetit dhe trafikantëve që janë shndërruar në oligarkë të rinj. Heshtja e policisë do të thotë bashkëpunim, vonesa në veprim do të thotë mbrojtje, mungesa e hetimit do të thotë kapje e shtetit.

Lul Morina është shembulli i qartë i asaj se si krimi i organizuar është integruar në politikë dhe ekonomi. Nga trafikant në vitet ‘90, ai është kthyer sot në “biznesmen të suksesshëm”, duke blerë vota për pushtetin dhe duke marrë leje ndërtimi në këmbim të shërbimeve të tij. Dhe sot, ai guxon të kërcënojë hapur gazetarë dhe qytetarë vetëm pse publikojnë të vërtetën.

Unë e them qartë: kërcënimet nuk më trembin dhe nuk do të më ndalin. Përkundrazi, ato janë provë e gjallë se shkrimi im ka goditur në zemër të së vërtetës. Ky është momenti kur Policia, Prokuroria dhe SPAK duhet të tregojnë se a janë në shërbim të qytetarëve apo në shërbim të trafikantëve të lidhur me pushtetin.

Shqipëria nuk mund të vazhdojë të jetë vendi ku trafikantët bëhen ndërtues, ku blerësit e votave bëhen partnerë të qeverisë, dhe ku kërcënuesit trajtohen si të paprekshëm. Lul Morina duhet të hetohet, të ndëshkohet dhe të ndalet përpara se kërcënimi i tij të bëhet realitet për këdo tjetër që guxon të thotë të vërtetën.

Ligji nuk mund të jetë armë në duart e pushtetarëve, ligji duhet të jetë mbrojtja e qytetarëve. Dhe nëse Policia dhe SPAK heshtin sot, nesër askush nuk do të ketë më besim tek shteti.