Shfaqje e shëmtuar në Greqi, politika ngatërrohet sërish me sportin, banderolë dhe thirrje “Kosova është Serbi”

Politika vazhdon të ngatërrohet me sportin dhe një tjetër rast aspak i këndshëm vjen nga Greqia. Në ndeshjen mes Olympiakos të Pireut dhe Aris të Selanikut që po mbahet në Georgios Karaiskakis Stadium (Piraeus) është vërejtur një banderolë me shkrimin: “Kosova është Serbi”.

Në tribuna u dëgjuan kore kundër Kosovës, ndërsa banderola i takon tifozëve të Olimpiacos. Kujtojmë që diçka e tillë vjen vetëm disa ditë pas shfaqjes së shëmtuar në Rumani, ku në ndeshjen kualifikuese të Kosovës, u shpalos një tjetër baner me mesazh të njëjtë.

Raste të tilla, natyrisht jo vetëm që nuk i shërbejnë lojës më të bukur në botë, por edhe zbehin magjinë e futbollit. Kujtojmë që Greqia është një nga vendet që ende nuk e ka njohur pavarësinë e Kosovës.