Prindërit e Martinit flasin mes lotëve: “Nuk duam hakmarrje, do të largohemi nga Shqipëria

Çdo shqiptar është i trishtuar nga krimi që ka vënë në pikëpyetje sesi po rritet rinia në vend, pasi të miturit po vrasin njëri-tjetrin me thikë për një fjalë. Një tragjedi që ka pikëlluar mbarë Shqipërinë ajo e Martinit të vogël, që në moshën 14-vjeçare u vra me thikë nga bashkëmoshatari i tij.

Për herë të parë flasin prindërit e Martinit, dhe mesazhi që japin është fisnik! ”Nuk duam hakmarrje”, thonë ata. ‘‘Ishte shumë fëmijë i dashur, ku ta gjej djalin unë?! Martini thoshte do bëhem futbollist i madh”, tha mes lotësh nëna e tij për ”Top Channel”.

Të pyetur nëse familja e autorit të dyshuar u ka kërkuar falje, ata shprehen se nuk kanë asnjë informacion. ”Ne nuk jemi njerëz që duam hakmarrje, duam paqe, duam të punojmë, ne duam të largohemi nga këtu, të shkojmë në SHBA te vëllai im. Mos i ndodhtë askujt. Dua ti jap mesazh njerëzve, askush nuk do ta bëjë djalin kriminel, këtë e besoj”, u shpreh i ati.

Ndërkohë babai i Martin Canit, ka dhënë një intervistë për emisionin “Të Paekspozuarit” në MCN TV. Ëngjëll Cani, gjatë intervistës për gazetarin Besmir Pula, ka rrëfyer momentet e para kur mori vesh se djali i tij ndodhej në spital me disa plagë në trup dhe më pas mësoi se është ndarë nga jeta. Ai deklaroi se është i tronditur nga ngjarja dhe se ende nuk e beson që diçka e tillë mund t’i ndodhte të birit në derën e shkollës.

“Mësuesja më tha Martini është te ‘Trauma’. Vajta aty, më thanë është në sallë të operacionit. Më thirrën pas gjysmë ore me shpresë se do të kishte vetëm një plagë thike, kurse moshatari i vet gjashtë thika. Por, pas gjysëm ore më thanë Martini nuk mbijetoi sepse kishte një thikë në zemër. Bota më ra përmbi kokë!

Pak më pare kisha mësuesen e Martinit dhe po më tregonte se ishte model, shembullor, një njeri që e donte e gjithë shkolla, e gjithë lagjia këtu. Pyet çdo njeri që e njeh Martinin, ishte lider i vërtetë, humorist i vërtetë, nuk kam fjalë ta përshkruaj”, tha Cani.

I pyetur për autorin e krimit, Cani tha se nuk e njeh atë dhe se familjarët e tij nuk e kanë ngushëlluar dhe as kanë kërkuar falje.

“Unë as nuk e njoh, as i kam mësuar emrin as nuk e di kush është, ku është dhe cili është, nuk kam asnjë lloj ideje. Të jem i sinqertë nuk kanë ardhur, asnjë lloj ngushëllimi, asnjëlloj falje, asnjë informacion nuk kam. Ndoshta nuk kanë kurajo, mund të ndihen fajtorë. Nuk besoj se ka njeri që do që djali i tyre të bëhet kriminel

Çdo prind nuk e do djalin ta ketë kriminel. Ata kanë qenë moshatarë, fajësoj dorën që e vrau. Kë të fajësos? Ajo dorë i mori jetën djalit tim, ëndrrat. Nuk dua ta kthej politike, unë i përkas thjeshtësisë dhe paqes, erdha të ndërtoj shtëpi dhe familje, erdha me mall për atdheun, të jetoj këtu. Më lindën dy cuna, dy yje, njërin ma mori Zoti, më mori zemrën”, – tha Cani.

Babai i 14 vjeçarit të ndjerë u ndal edhe te siguria në shkolla dhe protesta e zhvilluar ditën e sotme për të birin.

“Nëntë vjet ka qenë në atë shkollë. Unë jetoja në Londër, e drejta e klientëve që punoja, ishte një e drejtë që ta shihje klientin deri 500 metra të mos i ndodhte dicka, jo më nëpër shkolla. Aty në derë të shkollës të ndodhë kjo, është e habitshme, e trishtë, më duket ëndërr, nuk dua ta besoj, nuk e imagjinoj.

Nuk kam patur informacion sepse po të dija unë do shkoja në shkollë. Martini bënte shaka, edhe mbledhje kur kanë bërë, më thoshin Martini na mban gjallë. Nuk kisha shqetësime.

Nuk dua ta nxjerr pjesën politike, por cdo prind duhet të ndjejë një ndjesi për një djalë që ka humbur jetën. Po të kishte ndodhur në një vend të botës, jo të dorëhiqej ministri, por do të ishte ndryshuar qeveria. Edhe në Greqi, gjëra të tilla cfarë bëhet. Falenderoj të gjithë shqiptarët. Nuk dua t’i futem politikës, kam kontakte me të gjithë njerëzit, unë dua që djali im të prehet në paqe sic i takon.

Me policinë asnjë komunikim nuk kam patur sepse unë jam shumë i tronditur. Edhe sot që po flas dridhem i tëri, nuk e kisha kurajon, dua të gjej guximin dhe të falenderoj popullin shqiptar, prindërit, ata miq që më kanë repspektuar, kanë ngrënë nga një lugë të vogël helmi që unë po ha dhe po helmohem dita ditës”, – tha babai i 14 vjeçarit.

Ëngjëll Cani rrëfeu edhe takimin e fundit me të birin.

“Luajti një ndeshje me Kavajën, më tha luajta shumë mirë, do të bëhem futbollist me Kombëtaren. Më tha do të më marrë xhaxhi me vete sepse e kemi gjysmën e familjes në Amerikë. Xhaxhai i ushqente që do të marr në Amerikë për shkollë. Këto ëndrra kishte ai djalë. Ai flinte me topin, kishte qejf të bëhej si Christiano Ronaldo”, – tha Cani.

Gazetarja Lala foli për akuzën që rëndon mbi autorin e vrasjes dhe për problematikat e të rinjve sot.

“Nesër autori i dyshuar do të përballet me gjykatën. Policia e Tiranës e referoi fillimisht si vrasje me dashje, por prokurorja Alma Felaj e ka rënduar ditën e sotme, duke e akuzuar atë për vrasje në rrethana cilësuese, sepse ka dalë në konkluzionin, që viktima i mitur, prokuroria ka ngritur akuzën më të rëndë. Për shkak të moshës së mitur, ligji ka një kufi, rrugës do të përfitojë. Duhet të shohim hetimet pastaj si do të shkojë.

Është një ngjarje që na bën të reflektojmë, të shohim si po edukohet ky brez. Mekanizmat mbrojtëse. Unë jam nënë e dy vajzave. Vajza ime e madhe po shkon 13 vjeç, jam në situatë të vështirë, se si të qasem me fëmijën. Së pari fillon me familjen dhe kemi të vështirë se si komunikojmë. Pastaj shkon te mësuesit, psikologët që nuk janë prezentë në shkolla, oficeri i policisë që është i pamjaftueshëm, policia që nuk i menaxhon rastet si duhet, ministria, shëndetësia. Në rastin e Martinit, nuk e çuan në spital me ambualncë por nga një kalimtare, sepse ambulanca po vonohej. Pastaj drejtësia, burgjet, që nuk rehabilitojnë, por rikthehen në krim. Teknologjia, bullizmi. U përpoqa t’i mbaj fëmijët larg televizionit, por e mësuan në shkollë. Kam marrë pafund pyetje nga vajza e madhe.

A ka kontroll në shkollë? A duhet më shume prezencë policie? A duhet të ketë psikologu një panoramë të atyre që janë kontigjentë? A mund të ketë fëmijë që kryejnë krime, duke qenë të bullizuar në shkollë? Sot një fëmijë nuk mund ti veshësh të njëjtën bluzë, sepse bullizohet, je i varfër, je fakir që nuk vishesh si duhet.

Fillon që në Parlament, gjuha e parlamentarëve, shantazh, dhunë, që këtu fillon”, tha ajo.