FARSA SERBE/ Radoiçiç lirohet nga paraburgimi, gjykata në Beograd i ndalon kthimin në Kosovë

Gjykata në Beograd ka liruar sot Milan Radoiçiçin nga paraburgimi duke ia ndaluar shkuarjen në Kosovë.

Siç raportojnë mediat në Serbi, gjyqtari ka refuzuar propozimin e Prokurorisë së Lartë Publike në Beograd për caktimin e masës së paraburgimit për shkak të rrezikut të arratisjes.

“Gjyqtari për procedurën paraprake të Gjykatës së Lartë në Beograd, pasi ka dëgjuar të pandehurin M.R. për arsyet e caktimit të paraburgimit, refuzoi propozimin e Prokurorisë së Lartë Publike në Beograd për caktimin e masës së paraburgimit për shkak të rrezikut të arratisjes, njoftuan nga Gjykata e Lartë në Beograd”, raportohet në mediat e Serbisë.

Tutje bëhet e ditur se Radoiçiqit i është konfiskuar dokumenti i udhëtimit, përkatësisht pasaporta e Republikës së Serbisë.

Sipas mediave serbe Radoiçiqi është paralajmëruar se mund t’i shqiptohet paraburgimi nëse i shkel të drejtat dhe detyrimet.

Ministria e Punëve të Brendshme të Serbisë të martën kishte bërë të ditur se Milan Radoiçiq ishte arrestuar dhe se i ishte caktuar masa e ndalimit deri në 48 orë.

Radojiçiq pranoi publikisht se ka marrë pjesë në sulmet ndaj Policisë së Kosovës në fshatin Banjskë të Zveçanit më 24 shtator, ku është vrarë një zyrtar policor.

Përveç pjesëmarrjes në sulmin terrorist ndaj Policisë së Kosovës, ai kishte thënë se i ka bërë edhe të gjitha përgatitjet logjistike.

Policia e Kosovës u sulmua me armë zjarri më 24 shtator, nga një grup terroristësh serbë, ku mbeti i vrarë polici Afrim Bunjaku dhe u plagos polici Alban Rashiti.

Ndërkaq nga gjuajtjet me armë zjarri, Policia vrau tre pjesëtarë të grupit terrorist.

Sulmi terrorist ndaj Policisë së Kosovës është dënuar fuqishëm nga SHBA, BE dhe vendet e rajonit, ndërsa autoritetet në Kosovë janë zotuar se përgjegjësit e sulmeve terroriste do të dalin para drejtësisë.