Pas 30 vitesh lind një fëmijë: Fshati i braktisur feston beben e parë!

Në Pagliara dei Marsi, një fshat i lashtë rural në shpatet e malit Girifalco, në rajonin italian të Abruzzo-s, macet janë më të shumta se banorët.

Ato enden lirshëm në rrugicat e ngushta, hyjnë e dalin nga shtëpitë dhe shtrihen mbi muret që shohin nga malet, në një qetësi që prej dekadash shoqëron rënien e popullsisë. Por kjo qetësi u thye në mars, kur fshati përjetoi një ngjarje të rrallë dhe të festuar me entuziazëm: lindjen e një fëmije.

Lara Bussi Trabucco është foshnja e parë e lindur në Pagliara dei Marsi pas gati 30 vitesh, duke e çuar popullsinë e fshatit në rreth 20 banorë. Pagëzimi i saj në kishën përballë shtëpisë u ndoq nga i gjithë komuniteti – përfshirë edhe macet – dhe sot Lara është kthyer në atraksionin kryesor turistik të zonës.

“Njerëz që nuk kishin dëgjuar kurrë për Pagliara dei Marsi kanë ardhur vetëm sepse mësuan për Larën”, thotë nëna e saj, Cinzia Trabucco. “Në vetëm nëntë muaj, ajo është bërë e famshme”.

Ardhja në jetë e Larës është simbol shprese, por njëkohësisht nxjerr në pah krizën e thellë demografike që po përjeton Italia. Sipas të dhënave të institutit kombëtar të statistikave, Istat, në vitin 2024 lindjet ranë në një minimum historik prej 369 mijë e 944, duke vijuar një trend negativ 16-vjeçar. Norma e fertilitetit zbriti në 1.18 fëmijë për grua, një nga më të ulëtat në Bashkimin Evropian.

Arsyet janë të shumta: pasiguria në punësim, emigrimi masiv i të rinjve, mungesa e mbështetjes për nënat që punojnë, rritja e infertilitetit mashkullor dhe fakti se gjithnjë e më shumë njerëz zgjedhin të mos kenë fëmijë.

Të dhënat paraprake për shtatë muajt e parë të vitit 2025 tregojnë një rënie të mëtejshme të lindjeve. Situata është veçanërisht e rëndë në Abruzzo, ku nga janari në korrik u shënua një ulje prej 10.2% krahasuar me të njëjtën periudhë të vitit të kaluar.

Edhe pse shumë i vogël, Pagliara dei Marsi pasqyron realitetin e një Italie që po plaket, me shkolla që mbyllen dhe komunitete që zbrazën, duke ushtruar presion mbi financat publike dhe duke krijuar sfida të mëdha sociale e ekonomike.

“Kemi humbur shumë të moshuar dhe nuk ka pasur asnjë zëvendësim brezash”, thotë kryetarja e bashkisë, Giuseppina Perozzi, e cila shpreson që lindja e Larës të frymëzojë familje të tjera.

Cinzia Trabucco, 42 vjeçe, mësuese muzike, u kthye në fshatin e gjyshit të saj pas vitesh pune në Romë, me dëshirën për të rritur një familje larg kaosit të qytetit. Partneri i saj, Paolo Bussi, 56 vjeç, është punëtor ndërtimi nga zona.

Pas lindjes së Larës, çifti përfitoi një bonus njëherësh prej 1 mijë eurosh, pjesë e politikave të qeverisë së Giorgia Melonit për të luftuar atë që kryeministrja e quan “dimri demografik” i Italisë, si dhe një pagesë mujore rreth 370 euro për fëmijën.

Megjithatë, sfida kryesore mbetet përkujdesja ndaj fëmijëve dhe kombinimi me punën. Sistemi i çerdheve në Itali është i pamjaftueshëm dhe, pavarësisht retorikës për krizën e lindshmërisë, qeveria ende nuk ka arritur të përmbushë premtimet për zgjerimin e shërbimeve të kujdesit për fëmijët.