Dhëndri vritet gjatë festimeve ndërsa po martohej

Një ngjarje e rëndë ka ndodhur në veriun e Turqisë, ku një djalë i ri, i cili po martohej, humbi jetën nga të shtënat festive gjatë dasmës së tij.

Sipas mediave vendore, viktima është identifikuar si Ali K., 23 vjeç, i cili u qëllua për vdekje teksa po shoqërohej me bashkëshorten e re drejt shtëpisë pas ceremonisë martesore. Agjencia shtetërore Anadolu raporton se plumbat u qëlluan nga një e afërme e nuses, një grua 47-vjeçare.

Autoritetet kanë arrestuar gruan në fjalë dhe kanë sekuestruar dy armë pa leje që u gjetën në oborrin e saj. Prokuroria ka hapur një hetim të plotë për ngjarjen.

Të shtënat festive janë një praktikë e përhapur në dasmat në rajonin e Detit të Zi në Turqi, pavarësisht paralajmërimeve të vazhdueshme të autoriteteve për rrezikun e tyre. Vetëm javën e kaluar, një tjetër burrë humbi jetën dhe dy persona u plagosën në një dasmë në provincën Trabzon.

Ngjarja e detyroi familjen të anulonte ceremoninë, ndërsa dy persona u arrestuan, mes tyre edhe një oficer policie.

Kjo seri incidentesh ka ndezur debatin në Turqi për ndalimin dhe ndëshkimin e rreptë të të shtënave festive, të cilat shpesh kthejnë ditën më të gëzuar të një familjeje në një tragjedi të paharrueshme.