Rama i nënshtrohet një ndërhyrjeje kirurgjikale në QSUT

Kryeministri Edi Rama është paraqitur këtë të enjte në ambientet e QSUT, ku i është nënshtruar një operacioni. Burimet bëjnë me dije se ndërhyrja është kryer për hernien inguinale.

Operacioni ka shkuar mirë dhe është në gjendje të mirë shëndetësore, bëjnë të ditur burime nga QSUT.

Në njoftimin për mediat Kryeministria njofton se kreu i qeverisë pas ndërhyrjes pritet ta kalojë natën në ambientet e Qendrës Spitalore Universitare.

“Kryeministri Edi Rama aktualisht po i nënshtrohet një ndërhyrjeje kirurgjikale laparoskopike në Qendrën Spitalore Universitare “Nënë Tereza”. Ekipi mjekësor nën drejtimin e Prof. Dr. Arben Gjata po kryen ndërhyrjen kirurgjikale të hernies inguinale.

Pas përfundimit të ndërhyrjes, Kryeministri Rama pritet të kalojë natën e sotme në mjediset spitalore të QSUNT” ,-thuhet në reagimin e kryeministrisë.

Kujtojmë se Rama paralajmëroi në fund të gushtit se do të operohet sërish për shkak të një problemi shëndetësor.

Gjatë një vizite në QSUT, ku u përurua spitali ditor, Rama tha se do të paraqitet sërish si pacient, pasi duhet të kryejë edhe një ndërhyrje, për shkak të një problemi me hernien inguinale.

“Unë mund të flas edhe si pacient i spitalit që e provova vetë, madje mund të vij prapë për një tjetër ndërhyrje, kam një hernie inguinale që… i kam mësuar edhe emrin…

Se kësaj diskales nuk kërkoj mjek se punoj me forcat e mia, me streçing dhe vetëpërmbajtje para ushqimit që të mos e rëndoj shumë me kolonën e lodhur nga basketbollit, por kësaj inguinales me sa duket nuk i bëj dot derman me forcat e mia, kështu që do të vij prapë”, tha Rama.

Scroll to Top